ബഹ്‌റൈൻ കേരളീയ സമാജം സ്കൂൾ ഓഫ് ഡ്രാമയുടെ ഈ വർഷത്തെ ഭരത് മുരളി നാടക പുരസ്കാരം എ ശാന്തകുമാറിന്. മലയാള നാടക വേദിക്കു നൽകിയ സമഗ്ര സംഭാവനകൾ പരിഗണിച്ചാണ് അവാർഡ് നൽകുന്നതെന്ന് പ്രസിഡൻറ് പി.വി.രാധാകൃഷ്ണപിള്ള, ജനറൽ സെക്രട്ടറി എൻ.കെ.വീരമണി എന്നിവർ അറിയിച്ചു. 50000 രൂപയും പ്രശസ്തി പത്രവും അടങ്ങുന്നതാണ് അവാർഡ്. 1965ൽ കോഴിക്കോട് പറമ്പില്‍ ബസാറില്‍ ജനിച്ച ശാന്തകുമാർ കോഴിക്കോട് ആർട്സ് ആൻറ് സയന്‍സ് കോളജിലെ ബിരുദ പഠനത്തിന് ശേഷം നാടകരംഗത്ത് സജീവമാണ്. നാടകരചന, സംവിധാനം എന്നീ രംഗങ്ങളിൽ വ്യക്തിമുദ്ര പതിപ്പിച്ച അദ്ദേഹത്തിന് ‘പെരുംകൊല്ലന്‍’ എന്ന നാടകത്തിന് 1999ല്‍ സംഗീത നാടക അക്കാദമി അവാര്‍ഡ് ലഭിച്ചു. ‘സുഖനിദ്രയിലേക്ക്’, ‘പതിമൂന്നാം വയസ്’, ‘െൻറ പുള്ളിപ്പയ്യ് കരയാണ്’, ‘ദാഹം’, ‘കര്‍ക്കടകം’, ‘സ്വപ്‌നവേട്ട’, ‘ജയില്‍ ഡയറി’ തുടങ്ങി 60ലേറെ നാടകങ്ങള്‍ രചിച്ചു. ശയ്യാവലംബിയായ അജയന്‍ എന്ന നാടക നടനുവേണ്ടി രചനയും സംവിധാനവും നിര്‍വഹിച്ച ‘മരം പെയ്യുന്നു’ എന്ന നാടകവും ഏറെ ചര്‍ച്ചചെയ്യപ്പെട്ടു. നിരവധി പുരസ്കാരങ്ങൾ ലഭിച്ചിട്ടുണ്ട്. ഭാര്യ: ഷൈനി. മകള്‍: നീലാഞ്ജന
No comments:
Post a Comment