സിനിമയുടെ രസതന്ത്രം പങ്കുവെച്ച് ബേസില്‍ ജോസഫ്

കേരളീയ സമാജം സിനിമ ക്ളബിന്‍െറ ആഭിമുഖ്യത്തില്‍ നവാഗത സംവിധായകന്‍ ബേസില്‍ ജോസഫുമായി മുഖാമുഖം സംഘടിപ്പിച്ചു. എം.എം.രാമചന്ദ്രന്‍ ഹാളില്‍ നടന്ന പരിപാടിയില്‍ നിരവധി പേര്‍ പങ്കെടുത്തു. ഒരു ഷോര്‍ട് ഫിലിം പദ്ധതി ‘കുഞ്ഞിരാമായണം’ എന്ന സിനിമയായി മാറിയതിനുപിന്നിലെ കഥകള്‍ ബേസില്‍ പങ്കുവെച്ചു. കഴിവുകള്‍ ഒതുക്കിവെക്കാതെ സോഷ്യല്‍ മീഡിയ വഴിയും മറ്റും ആവിഷ്കാരം നടത്താന്‍ ശ്രമിക്കണമെന്നും അപ്പോള്‍ അവസരങ്ങള്‍ തേടിവരുമെന്നും അദ്ദേഹം പറഞ്ഞു. ദേശീയ-അന്തര്‍ദേശീയ തലങ്ങളില്‍ അവാര്‍ഡുകള്‍ വാരിക്കൂട്ടുന്ന പല നല്ല സിനിമകളും ശ്രദ്ധിക്കപ്പെടാതെ പോകുന്നത് പ്രേക്ഷകര്‍ തിയറ്ററില്‍ പോയി അത്തരം ചിത്രങ്ങള്‍ കാണാത്തത് കൊണ്ടാണെന്ന് അദ്ദേഹം കൂട്ടിച്ചേര്‍ത്തു. ‘ഗുസ്തി’ പശ്ചാത്തലമാക്കി ഒരുക്കുന്ന തന്‍െറ പുതിയ ചിത്രത്തിന്‍െറ ജോലികള്‍ പൂര്‍ത്തിയായി വരുന്നതായി അദ്ദേഹം പറഞ്ഞു. ചടങ്ങില്‍ സമാജം ആക്റ്റിങ് പ്രസിഡന്‍റ് ഫ്രാന്‍സിസ് കൈതാരത്ത്, ജനറല്‍ സെക്രട്ടറി എന്‍.കെ.വീരമണി, കലാവിഭാഗം സെക്രട്ടറി മനോഹരന്‍ പാവറട്ടി, സിനിമ ക്ളബ് കണ്‍വീനര്‍ അജിത്നായര്‍ എന്നിവര്‍ സംസാരിച്ചു. ജോ.കണ്‍വീനര്‍ രഞ്ജിഷ് മുണ്ടക്കല്‍ നന്ദി പറഞ്ഞു.